UiA fekk leiarrolla i satsing på regional samskaping og kunst

Av: Kamachi Ruthramurthi

UiA sin rektor Sunniva Whittaker (biletet) er svært fornøgd med avgjerda om å tildele leiaransvaret for nysatsinga til Universitetet i Agder.

- Å leie dette er stort for UiA. Det er ei tydeleg tillitserklæring til kunstfagmiljøet vårt, og til kompetansen til universitetet når det gjeld samskaping, seier ho.

Samskaping, inkludert det å bringe partnarar frå utsida av akademia og universiteta til bordet, er i det heile eit av kjenneteikna til Forthem samanlikna med andre universitetsalliansar. UiA har lang tradisjon for å samhandle med dei regionale partnarane sine. Slik vil det også vere med omsyn til aktivitetar i både alliansen og i denne nye og spennande satsinga.

Leiar samskapinga i alliansen

Forthem sitt nye laboratorium, som har fått namnet Kunst og estetikk i samtidssamfunnet, inngår som éin av i alt ni samhandlingslaboratorium i alliansen - eit nettverk av ni tverrfaglege offentlege forskingsuniversitet med sterk regional forankring i Finland, Frankrike, Tyskland, Italia, Latvia, Noreg, Polen, Romania og Spania.

I tillegg til å leie laboratoriet knytt til kunst og kultur, har UiA og eit koordineringsanvar for samhandling generelt og laboratoria spesielt i alliansen. Dette har UiA fått med bakgrunn i universitetet sin erfaring med nettopp samhandling. UiA har dermed fått ei stor rolle i universitetsalliansen.  I kroner og øre er verdien av UiA sin deltakelse  i Forthem verd nær 22 millionar kroner.

Fakultet for kunstfag

 På UiA er det Fakultet for kunstfag og Fakultet for humaniora og pedagogikk som skal leie arbeidet med kunst-labben, der meininga er å gi akademikarar, kunstnarar, musikarar, innbyggjarar, studentar og regionale partnarar høve til å samarbeide og utvide eksisterande forsking på like vilkår. Målet er å skape nye arenaer for meiningsfull utveksling gjennom kunst og estetiske tilnærmingar i samfunnet, og slik også endre forholdet dei deltakande universiteta har til regionen – og omvendt.

Sjølve arbeidet skjer gjennom ulike prosjekt, verkstader, tankesmier, kunstproduksjonar og symposium, det samskaping står sentralt. For det nyetablerte idé-laboratoriet skal desse nå planleggast, etablerast og bli gjennomført dei neste fire åra. Den første idé-samlinga haldast hausten 2023.

Dei regionale samarbeidspartnarane til UiA i Forthem-satsinga er til no Agder fylkeskommune, Kristiansand kommune, NHO Agder, Arkivet freds- og menneskerettssenter og GCE Node. Satsinga er open for fleire samarbeidspartnarar frå Agder.

Det unikt menneskelege

UiA sin vitskapleg koordinator for satsinga, universitetslektor Marius Lønskog Igland (biletet), er som UiA sin rektor også fornøgd med tildelinga.

- Mitt håp er at samhandlingslabben som vi no skal leie, vil vise korleis deltaking og erfaring med kunst og estetiske uttrykk er eit grunnleggjande menneskeleg behov - ikkje ein luksus, og korleis dette behovet møter verkelege livsutfordringar og hard politikk, seier han.

For Igland betyr det å gi stemmer til enkeltpersonar og grupper gjennom kunstformer, og etablere arenaer for utveksling mellom menneske.

- I ei verd med auka polarisering, fiendskap i offentleg debatt, økologisk samanbrot, færre sosiale arenaer og aukande einsemd, minner kunst og estetikk oss om kva som er unikt menneskeleg og opnar dører til framsyningsverder som enno ikkje eksisterer, seier han.