Gjenbruk
Sirkulære løysingar og gjenbruk blir stadig viktigare. Universitetet i Agder prøver derfor å gjenbruke møblar og inventar blant anna gjennom restaurering av møteromstolar og sofaer, og dessutan gjenbruk av hyller og anna inventar.
Mobilitet
Universitetet i Agder oppfordrar studentar og tilsette til å velje miljøvenleg transport til og frå campus. For dei som ønsker å sykle har vi tilrettelagt med utvendig sykkelparkering fleire stader. Det er også mogleg å parkere sykkelen i Pedalen, det låsbare sykkelhotellet vårt. Både tilsette og studentar har tilgang på garderobar og dusjfasilitetar på begge campusar. I tillegg har vi utlån av syklar og elbil til våre tilsette.
Energiproduksjon
På universitetet i Agder satsar vi på eigenproduksjon av fornybar energi. Vi har totalt over 1800 m² med solceller på tak i Kristiansand, og dessutan over 2000 m² på tak i Grimstad. I tillegg har vi 200 m² med solceller i fasadar og vindauge i Kristiansand. Vi har også 20 energibrønnar i produksjon i Grimstad. Bygningen som husar i4Helse er 80 prosent sjølvforsynt med fornybar energi gjennom solceller og energibrønnar. Vi ønsker å fortsette utviklinga og ønsker å bli endå meir sjølvforsynte av energi i åra som kjem.
Energireduksjon
UiA jobbar med reduksjon i energibruk saman med byggeigarane på begge campusar, og har som målsetting å redusere energibruken med 40 prosent innan 2030. Det har blitt investert i Led-belysning fleire stader og arbeidd med vidare utskifting fortset. Universitetet nyttar i stor grad sensorteknologi for ventilasjon og belysning, noko som er med på å redusere unødvendig oppetid. Campus Kristiansand har sidan 2013 hatt energioppfølgingssystem. Med fleire målepunkt på campus har det vore mogleg å identifisere energitjuvar og med utgangspunkt i det innføre treffsikre ENØK-tiltak.
Kjeldesortering
I 2024 oppnådde vi ei kjeldesorteringsgrad på cirka 60 prosent. Denne ønsker vi sjølvsagt å auke. Vi har sett oss eit mål om at 75 prosent av avfallet skal kjeldesorterast innan 2030. Vi har derfor miljøstasjonar med eigne fraksjonar for matavfall, glas- og metallemballasje, plastemballasje, elektronisk avfall og batteri, pant, papp og papir og restavfall plassert på sentrale stader på begge campusar. Ved å oppfordre og informere om rett sortering av avfall håpar vi på auka kjeldesortering framover.
Miljøfyrtårn
Universitetet i Agder har våren 2024 blitt miljøfyrtårnsertifisert. Miljøfyrtårn er Noregs mest brukte sertifikat for verksemder som vil dokument miljøinnsatsen sin og vise samfunnsansvar.
Sjå meir informasjon om kva det betyr for UiA å bli miljøfyrtårnsertifisert