Even Andreas Lie
- Jobb: Rådgivar
- Arbeidsgiver: Kristiansand kommune
- Uteksaminert: 2022
Utdanning:
Statsvitskap og leiing, master
Studiet har gjort meg betre rusta til å bidra i endringsprosessar og legge til rette for godt samarbeid.
Prosjektarbeid på tvers av landegrenser
Even jobbar som rådgivar i Kristiansand kommune, der han er prosjektansvarleg i eit Interreg-ØKS-prosjekt. Interreg-øks er eit EU-program som gir økonomisk støtte til prosjekt som ønsker å jobbe for å løyse samfunnsutfordringar på tvers av landegrensene i Sør-Skandinavia. Saman med aktørar frå Sverige og Danmark skal prosjektet, som Even er ansvarleg for, utvikle og teste aktivitetar for å behalde internasjonale talent i regionen.
Han arbeider også med Relocation Agder, ei teneste som gjer det enklare for bedrifter å rekruttere internasjonal kompetanse.
- Gjennom jobben får eg høve til å møte menneske frå heile verda og bli kjent med ulike kulturar.
Ein spennande overgang til arbeidslivet
Etter studiane fekk Even plass i Trainee Sør-programmet, der han hadde ein periode i same avdeling som han jobbar i nå.
- Etter å ha hatt ei plassering i avdelinga gjennom Trainee Sør, fekk eg tilbod om eit engasjement.
Even beskriv overgangen frå studium til arbeidsliv som både lærerik og spennande.
- Det er ikkje alltid lett å vite kva ein ønsker å jobbe med etter studiane, og eg har vore så heldig å få vere med i Trainee Sør. Her får ein høve til å prøve ulike arbeidsoppgåver i tre ulike verksemder. Det har gjort overgangen veldig spennande. Ein får oppleve ulike organisasjonskulturar, samtidig som ein får eit stort nettverk og jobbar med varierte og interessante oppgåver.
Som prosjektleiar krevst det mykje koordinering og samarbeid med aktørar som har ulike organisasjonsstrukturar. Even forklarer at utdanninga gav han ei betre forståing for korleis ulike organisasjonar fungerer.
- Det har gjort meg betre rusta til å bidra i endringsprosessar og legge til rette for godt samarbeid.
Bacheloroppgåva skapte interesse for organisasjonsutvikling
Bakgrunnen for valet av studium ved UiA, forklarer Even, er bacheloroppgåva han skreiv om korleis implementering av CRM-system fungerer.
- Etter oppgåva blei eg meir nysgjerrig på korleis organisatoriske og menneskelege faktorar påverkar endringsprosessar. Derfor valde eg denne utdanninga der ein får ei djupare forståing av politiske og organisatoriske prosessar, og lærer meir om korleis endringsleiing påverkar organisasjonsutvikling.
Tilrår studiet i statsvitenskap og leiing
Even tilrår utdanninga ved UiA til alle som er nysgjerrige på korleis politiske og organisatoriske prosessar påverkar verksemder, og som vil lære meir om organisasjonsutvikling og leiing.
- Universitetet i Agder har eit veldig godt studiemiljø, og for ein kaffielskar vil eg også tilrå kaffibaren på campus, med dei mest hyggelege folka.
Tips til studentar
- Ver nysgjerrig, engasjer deg i studentforeiningar eller aktivitetar, og ikkje ver redd for å ta kontakt med bedrifter for å bygge nettverk.