Arbeid innan berekraftig teknologiutvikling i havbruk

Stian Borg-Stoveland

Jobb: Technology Developer

Arbeidsgivar: EcoFishCircle AS

Uteksaminert: 2025

Utdanning: 

Biologi (Bachelor)

Kystsoneøkologi (Master)

Gjennom bachelor-, master- og doktorgrad har eg utvikla ei djup forståing for biologiske og økologiske prosessar.

Kombinerer forsking, utvikling og drift

Stian er tilsett som Technology Developer i EcoFishCircle AS, der han har eit breitt ansvarsområde som spenner frå forsking og utvikling til operativ støtte.

– Eg har hovudansvar for å utvikle EcoFishCircle sitt sirkulære konsept gjennom forskings- og utviklingsprosjekt knytte til utnytting av avfallsstraumar frå oppdrettsanlegg.

Stian følger opp sertifiseringar og sørger for at system og prosjekt halde rett kvalitet og oppfyller gjeldande krav. I tillegg har han ansvar for dialog og samarbeid med støtteordningar som Innovasjon Norge og SkatteFUNN, både i igangverande prosjekt og i utviklinga av nye.

Ved behov er han også med i den daglege drifta, samarbeider tatt med både service personell og veterinær, og følger opp målingar og analysar knytte til vasskvalitet.

Ei stilling som vaks ut av doktorgradsarbeidet

Vegen inn i EcoFishCircle starta gjennom ein industri-PhD i samarbeid med UiA. I løpet av doktorgradsprosjektet jobba Stian tett med selskapet på problemstillingar knytte til resirkulerande akvakultursystem og berekraftige løysingar. Dermed bygde han inngåande kjennskap til både teknologien og den praktiske drifta i selskapet.

– Etter at industri-Phd-løpet var avslutta, ønskte selskapet å ha meg med vidare på laget, og stillinga eg har i dag blei etablert for å føre vidare og operasjonalisere kompetansen og resultata frå doktorgradsarbeidet.

Frå akademia til næringsliv

Overgangen frå studium til arbeidsliv beskriv Stian som både krevjande og lærerik. Etter mange år i akademia var han godt førebudd fagleg, særleg innan analyse, strukturert problemløysing og handtering av komplekse problemstillingar.

– Det som i større grad var uvant, var tempoet i arbeidskvardagen og det tydelege fokuset på framdrift, prioriteringar og praktisk gjennomføring. Overgangen har kravd tilpassing til meir tverrfaglege samarbeid og kortare avgjerdslinjer, noko som har vore både utfordrande og utviklande. Eg blei også positivt overraska over kor direkte anvendbar forskingskompetansen er i næringslivet.

Eit studieval forma av interesse og moglegheiter

Stian starta studieløpet seinare enn mange andre. Før han begynte på bachelor i biologi, hadde han fleire år bak seg i arbeidslivet innan sal og butikk. Interessa hans for natur, miljø og friluftsliv, i tillegg til eit ønske om å bygge ein fagleg kompetanse og identitet gjorde at han valde å studere.

– Den opphavlege planen var å fullføre ei mastergrad og deretter søke meg ut i arbeidslivet. Undervegs i studieløpet opna det seg likevel moglegheiter gjennom samarbeid med næringslivet, og gjennom ein kombinasjon av fagleg interesse og samantreff enda eg opp med å starte på ein industri-PhD.

Denne utviklinga gjorde det mogleg for Stian å kombinere akademisk fordjuping med anvendt forsking og konkrete problemstillingar frå næringslivet.

Kunnskap som blir brukt direkte i praksis

Stian forklarer at studiane har vore svært arbeidslivsrelevant, særleg fordi han utvikla ein kombinasjon av solid teoretisk forståing med anvendt forsking og praktisk problemløysing.

– Gjennom bachelor-, master- og doktorgrad har eg utvikla ei djup forståing for biologiske og økologiske prosessar, som i jobben min er direkte overførbare til arbeid med resirkulerande akvakultursystem, vasskvalitet og berekraftige produksjonsløysingar.

Han opplever ferdigheiter innan datainnsamling, analyse og tolking som særleg nyttig, og dessutan evna til å strukturere komplekse problemstillingar og omsette dei i konkrete tiltak.

Tilrår studiar innan naturvitenskap på UiA 

Stian tilrår både studiane sine og UiA som utdanningsinstitusjon. Han trekker fram dyktige og engasjerte forelesarar, eit breitt naturvitskapleg miljø og tett samarbeid med sterke eksterne fagmiljø.

– UiA har også låge tersklar for kontakt med fagleg tilsette og gode rammer for studiar, med ein oversiktleg og triveleg campus, god tilgang på lesesalar og grupperom, og dessutan eit godt sosialt miljø. Studiet passar særleg godt for studentar som er nysgjerrige, fagleg motiverte og ønsker ei utdanning med tydeleg kopling til både forsking og arbeidsliv.

Eit nettverk som varer

Stian har framleis god kontakt med andre alumnar frå UiA. Mange jobbar i dag innan blå og grøn næring, og dei møtest jamleg på konferansar, faglege samlingar og i prosjektsamanheng.

– Per i dag planlegg eg også eit prosjekt som involverer UiA-alumnar, som nå er kollegaer i arbeidslivet. Det illustrerer korleis studiemiljøet ved UiA legg til rette for varige faglege relasjonar som strekker seg langt utover studietida.

Tips til studentar

– Mitt beste råd til nye studentar er å ta studiane på alvor frå dag éin. Ikkje utsett arbeid, men kom tidleg i gang og behandle studiet som ein jobb, med faste rutinar og jamn arbeidsinnsats. Det gir både betre læring og mindre stress over tid.

– Eg vil også oppfordre studentar til å ikkje vere redd for å be om hjelp. Ta kontakt med forelesarar, rettleiarar og andre fagpersonar, terskelen er ofte lågare enn ein trur, og eg har aldri opplevd noko negativt ved å spørje. Dette bidrar både til fagleg utvikling og til å bygge eit verdifullt nettverk.

– Til slutt vil eg tilrå å engasjere seg aktivt i studietida og si ja til moglegheiter som dukkar opp, enten det er arbeid som vitskapleg assistent, deltaking i forskingsprosjekt eller andre relevante aktivitetar.