Adam Smith
Jobb: Overingeniør - Domain Administrator/UiO-CERT
Arbeidsgiver: Universitetet i Oslo
Uteksaminert: 2023
Utdanning:
Data - ingeniørutdanning (bachelor)
Cybersikkerhetsleiing (master)
Jo meir relevant du kan vise at du er, jo større sjanse har du for å skilje deg ut.
Holder UiOs digitale system i gang og trygge
Adam starta i ei 100% stilling i seksjonen for operativsystem ved UiO. I dag har han i tillegg ei 20% stilling i UiO-CERT, der han jobbar med handtering av sikkerheitshendingar.
Adam gjekk inn i stillinga i seksjonen for operativsystem med drift av Windows-serverar og tenester for sensitive data. Etter kvart fekk han rolla som domeneadministrator, der han har ansvar for det som skjer i UiOs Windows-domenemiljø. Dette inneber feilsøking, synkronisering mot skya, drift av Windows serverar og generell kvalitetssikring av systema.
- Akkurat nå jobbar eg mykje med å kombinere Linux og Windows system. For å få dette til å fungere, må eg skrive ein del skriptar og finne kreative omvegar; sidan Windows og Linux ikkje alltid er bestevener. Målet med dette arbeidet er å auke sikkerheita i heile domenet vårt.
Ei anna viktig oppgåve i Adams rolle som domeneadministrator er å skanne heile Active Directory for svakheiter, feilkonfigurasjonar og sikkerheitshol, for så å tette dei.
I rolla si i UiO-CERT handterer Adam blant anna phishing-saker, skadeleg programvarer og svindelforsøk som treffer tilsette og studentar. Sakene varierer frå falske e-postar frå «Skatteetaten» til svindlarar som gir seg ut for å vere direktøren i universitetet.
- Dagane i UiO-CERT er ofte ganske hektiske, fordi vi jobbar med hendingar som må handterast raskt.
Jobben kom ikkje gjennom nettverk, men gjennom innsats
Då Adam begynte å søke jobbar, hadde han ikkje eit etablert nettverk i IT-bransjen. Overgangen frå studium til arbeidsmarknaden beskriv han som ganske tøff. Han fekk avslag etter avslag, og innsåg raskt at CV og søknad måtte finpussast for å kome vidare i søknadsprosessen.
Adam brukte fritida på å oppdatere seg på ny teknologi og oppgåver som var relevant for stillingane han søkte på. Han laga til og med ein eigen PowerPoint-presentasjon som han viste på intervjua for å skilje seg ut. Nåverande stilling fann han på Finn.no og måtte så løyse ei teknisk oppgåve før han blei kalla inn til intervju.
- Leiaren fortalde seinare at dette var for å skilje mellom dei som var seriøst interesserte, og dei som berre søkte på alt mogleg. Konkurransen er stor, så ein må gjere noko ekstra for å bli lagd merke til.
Ei livslang interesse for korleis ting fungerer
Adam har alltid vore fascinert av korleis ting fungerer. Som barn demonterte han leiketøy for å forstå dei, og i vaksen alder blei dette ei interesse for nettverk og cybersikkerheit.
- Eg var ikkje spesielt glad i programmering, derfor valde eg nettverk først, og seinare cybersikkerheit. Eg syntest det var veldig spennande å sjå korleis ein kan finne svakheiter i datasystem. Det likna litt på det eg gjorde i barndomen, berre at eg nå brukte ein terminal i staden for ein skrutrekkar.
Ei relevant utdanning
Masteren i cybersikkerheitsleiing blei spesielt viktig for å få stillinga i UiO-CERT. Han bruker mykje av det han lærte studiet i arbeidskvardagen sin, alt frå trusselmodellar til rammeverk som MITRE ATT&CK.
- Utdanninga er i seg sjølv attraktiv for arbeidsgivarar. Då eg berre hadde bachelor, kom eg sjeldan vidare i prosessane. Etter at eg starta på master i cybersikkerheit, spesielt mot slutten, blei eg nesten alltid kalla inn til intervju på stillingar eg søkte på.
Tips til studentar
Adam har to klare tips til studentar, både til studietida og tida etter:
- Mitt beste råd er, å vere engasjert, og jobb med faget også utanom det du må gjere for å stå på eksamen. Ikkje avgrens deg til berre oppgåvene du får gjennom studiet, men gjer noko ekstra i tillegg. For eksempel finst det mange gode nettsider og plattformer der du kan lære meir og øve praktisk, som Hack The Box og TryHackMe.
- Når det gjeld jobbsøking, les stillingsannonsen nøye, sett deg inn i alle oppgåvene som står der, og prøv å lære deg mest mogleg av det på førehand. Jo meir relevant du kan vise at du er, jo større sjanse har du for å skilje deg ut.