Roman Slobodchikov
Jobb: Dataarkitekt
Arbeidsgivar: Norkart AS
Uteksaminert: 2018
Utdanning:
Studiane viste seg å vere svært relevante. Mykje av æra går til dyktige studiekoordinatorar som kopla studentar og bedrifter tidleg i studieløpet.
Utviklar smarte løysingar
Som dataarkitekt i Norkart jobbar Roman med å utvikle løysingar som kombinerer teknologi, analyse og brukaroppleving. Arbeidet handlar i stor grad om å gjere komplekse datasett meir tilgjengelege og intuitive å bruke, ofte med kart som eit sentralt verktøy.
– Oppgåvene mine reflekterer nok personlegdomen min ganske godt. Eg er veldig interessert i teknologi og lure løysingar, og mykje av det eg driv med handlar om det.
Han forklarer at dei fleste oppgåvene hans kan samanfattast med eitt spørsmål: Korleis lagar vi ein mordarane teknologisk løysing som er intuitiv å bruke?
Jobben er variert og spenner frå teknisk utvikling til design av løysingar som skal fungere både for ekspertar og sluttbrukarar.
Nettverk blei vegen inn i jobben
Jobben i Norkart kom gjennom nettverket hans, ikkje ei tradisjonell utlysing. Det gav ein meir uformell inngang til tilsettingsprosessen og betre rom for å bli kjent med både rolla og arbeidsgivaren.
– Ein slik prosess gir rom for å bli ordentleg kjent, og ikkje mist rom for deg som søker til å stille dei gode spørsmåla som avgjer om bedrifta og oppgåvene faktisk passar deg og karrieremåla dine.
Roman trekker fram nettverk som ein viktig faktor for å oppdage moglegheiter som ikkje nødvendigvis blir lyste ut offentleg.
Ein naturleg overgang til arbeidslivet
Overgangen frå studium til jobb opplevde han som saumlaus. Han fekk jobb allereie før han var ferdig med studiet, og gjekk rett inn i ei relevant rolle.
– Etter masteren blei eg tilsett av bedrifta eg skreiv masteroppgåve for, og blei verande der i mange år før eg gjekk vidare til Norkart.
Den første tida i arbeidslivet beskriv han som ein gøy og viktig læringsfase, der ein utviklar både fagleg kompetanse og forståing for kva ein trivst å jobbe med.
Nysgjerrigheit som retning
Valet av utdanning var ikkje låst til éin tydeleg plan, men prega av interesse og nysgjerrigheit. Han hadde erfaring frå offshore-industrien før studiet, noko som gjorde byggingeniør til eit naturleg val.
– Byggsivilingeniør kjentest som eit rett val om eg ville bli betre på materialteknologi og analyse av strukturar.
Sjølv om han i dag jobbar i ein annan bransje, har ingeniørutdanninga gitt ei problemløysingstilnærming som er relevant på tvers av fagfelt.
Kompetanse som kan brukast breitt
Utdanninga viste seg å vere svært relevant i starten av karrieren, og gav eit godt grunnlag for vidare utvikling. Studiet var tett kopla til arbeidslivet, blant anna gjennom samarbeid med bedrifter og gjesteforelesarar.
– Studiane viste seg å vere svært relevante. Mykje av æra går til dyktige studiekoordinatorar som kopla studentar og bedrifter tidleg i studieløpet.
Roman peikar på at faga var godt tilpassa kompetansebehovet frå arbeidsmarknaden. Fleire av faga blei underviste av engasjerte gjesteforelesarar som endre opp med å tilsette mange av medstudentane hans. Han peikar også på at studiet utviklar seg i takt med behova i samfunnet, noko som gjer kompetansen relevant over tid.
– Studiet slik det var då, er kanskje ikkje heilt det same i dag, og det er ein god ting. Det betyr at universitetet bruker ressursar på å sørge for at studentane kjem ut med kunnskap som faktisk er etterspurd.
Frå BIM til data og analyse
Eit konkret eksempel på nytteverdien av studiet, forklarer Roman, er erfaringa med digitale verktøy og BIM (bygningsinformasjonsmodell). Dette gav han ei tidleg forståing for korleis teknologi blir brukt i praksis.
– Den undervisinga var direkte relevant, for vi lærte å bruke programvarer som entreprenørar, rådgivarar og byggherrar bruker dagleg.
Denne erfaringa blei også starten på ei vidare interesse for kartdata og analyse, som til slutt førte til jobben Roman har i dag.
Eit studium med mange moglegheiter
Roman tilrår studiet til studentar som ønsker å jobbe med løysingar som har samfunnsverdi. Han trekker fram breidda i moglegheiter og korleis utdanninga opnar dører i både offentleg og privat sektor.
– Mange av klassekameratane mine jobbar i private og offentlege stillingar som bokstavleg talt bygger Noreg og norsk teknologi og kunnskap.
Han forklarer at studiet passar både for dei som vil fordjupe seg og bli ekspertar i sitt felt, og for dei som ønsker ei meir tverrfagleg rolle.
– Mi meining er at dette er ei utdanning som held tritt med tida og vil vere aktuell same kva verda og tida bringar av teknologi og utfordringar. Det hjelper jo også at mange stillingar som er aktuelle etter enda utdanning er godt betalte stillingar.
Tips til studentar
– Bruk tida på studiet til å bli kjent med både klassekameratane dine og studentar frå andre studiar. Ein stor del av venekretsen min i dag er folk eg møtte på studiet, og det er verkeleg gøy å kunne seie at vi er vener for livet.
– Om du vel å jobbe ved sida av studiane, pass på at jobben ikkje et opp all tida. Studietida er noko du har i ein avgrensa periode, mens resten av livet har du på å jobbe. Prøv gjerne å finne ein deltidsjobb som har ein viss relevans til det du studerer.
– Gå på alle bedriftskveldane som blir arrangerte av studiekoordinator, fagforeining og liknande. Ofte får du gratis mat, og endå oftare får du kontaktar du seinare kan skrive oppgåve for eller søke jobb hos.
– Gjennom studiet lærer du mykje nytt om mange ulike emne. Reflekter undervegs over kva du synest er gøy og interessant, og bruk litt ekstra energi på å finne ut om noko av det kan vere nisjen din.