Lea Wøyen Lenes
Jobb: Bioingeniør
Arbeidsgivar: Sykehuset i Vestfold
Uteksaminert: 2025
Utdanning:
Vel du denne utdanninger er du garantert jobb etter enda studie.
Ein variert arbeidskvardag i laboratoriet
Som bioingeniør ved avdeling for medisinsk biokjemi har Lea ein arbeidskvardag som spenner breitt. Ho jobbar med blodprøvetaking, analysering av pasientprøver som blod, urin og andre kroppsvæsker, tolking av resultat og vedlikehald av avansert laboratorieutstyr.
– Ei vanleg arbeidsveke som bioingeniør er variert, og ein jobbar som regel innanfor ulike faggrupper i løpet av ei veke.
Arbeidsoppgåvene inneber også prøvetaking på akuttmottaket, poliklinikk og vaktprøver rundt omkring på sjukehuset.
– Dette er prøver det hastar med som skal takast. Ofte gjeld dette pasientar som akutt har blitt dårlegare og lege treng svar på prøvene raskt for å gi rett behandling.
Lea jobbar jamleg med laboratorieoppgåver som pipettering av pasientmateriale, mikroskopering av urinprøver, og dessutan analysering og vedlikehald av ulike instrument for å sikre at instrumenta fungerer best mogleg. Ho forklarer at kvalitetssikring er svært sentralt i arbeidet dei driv med for å sikre at rett svar på pasientprøvene blir gitt ut slik at pasientane får rett behandling.
Ein tidleg start på vegen til fast jobb
Lea kom tidleg inn i arbeidslivet gjennom sommarjobb på Sjukehuset i Tønsberg etter første studieår. Ho jobba der to somrar på rad, noko som gav både erfaring og kjennskap til arbeidsplassen og kollegaer.
Ho gjorde arbeidsgivar merksam på at ho tenkte å flytte tilbake til heimbyen etter enda studium, og dei oppfordra henne til å søke når det blei kunngjort fast stilling.
– Då eg søkte, hadde arbeidsgivar allereie kjennskap til meg, noko som gjorde tilsettingsprosessen mykje enklare.
Lea fekk tilbod om fast stilling under hennar siste semester i januar 2025 og starta i jobben same sommar.
Ein overgang som krev tilvenning
Overgangen frå studium til arbeidsliv opplevdes som ei omstilling, særleg med tanke på turnusarbeid og mindre fleksibilitet enn i studietida.
– Overgangen frå studium til arbeidsliv opplevdes som litt brå, sjølv om eg hadde arbeidserfaring frå før.
Samtidig kjente ho seg godt fagleg rusta, og opplevde at studiet hadde førebudd henne godt på arbeidsoppgåvene.
– Det som overraska meg mest, var kor raskt ein får ansvar i praksis.
Valde ei meir analytisk retning
Interessa for naturfag, biologi og prosessane til kroppen låg til grunn for studievalet. Sjølv om ho først vurderte sjukepleie, oppdaga ho at bioingeniørstudiet passa betre.
– Personleg trivst eg best inne på laboratoriet, derfor passa bioingeniøryrket meir for meg.
Studiet kombinerer naturvitskap, teknologi og medisin, og gav henne ei meir analytisk rolle i helsetenesta.
Ei utdanning med direkte relevans
Lea opplever at utdanninga frå UiA har vore svært relevant i møte med arbeidslivet. Praksisperiodane ved ulike sjukehus gav innsikt i korleis yrket faktisk fungerer i praksis.
– Gjennom både teori og praksis fekk vi opparbeidd oss grunnleggande kunnskap og ferdigheiter som er direkte overførbare til jobben.
Ho forklarer at det spesielle med bioingeniøryrket er at ein kan jobbe innan mange ulike fagområde, alt frå medisinsk biokjemi til blodbank. Gjennom praksisperiodane fekk ho god kjennskap til desse ulike områda.
– Det gjorde det lettare å finne ut av kva eg sjølv var mest interessert i, og kva eg ønskte å jobbe vidare med.
Den praktiske til tilnærminga til undervisinga ved UiA gjorde overgangen til arbeidslivet enklare.
– Vi lærte å jobbe med ulike teknologiske instrument som også blir tatte i bruk på sjukehusa. Vi hadde også mykje praktisk laboratoriearbeid, noko som gav oss høve til å bruke teorien i praksis og lettare forstå det vi studerte.
Utdanninga for deg som liker å jobbe nøyaktig og strukturert
Lea tilrår bioingeniør til alle som er interesserte i biologi, kjemi, teknologi og laboratoriearbeid.
– Utdanninga passar også spesielt godt for dei som liker å jobbe nøyaktig og strukturert.
Ho trekker også fram dei ulike karrieremoglegheitene som utdanninga opnar døra for.
– Vel du denne utdanninga er du garantert jobb etter enda studie samtidig som du får ein ganske variert, trygg og spennande karriere innanfor helse og laboratoriefag.
Tips til studentar
– Eg kan verkeleg tilrå studentlivet i Kristiansand og på UiA. Om du ønsker å få mest mogleg ut av studietida, vil eg spesielt tilrå å engasjere deg i studentaktivitet, for eksempel eit studentidrettslag. Det er ein veldig god måte å bli kjent med nye menneske på, samtidig som du får eit sosialt avbrekk i ein elles travel studiekvardag. Eg angra sjølv på at eg ikkje blei med i eit studentidrettslag tidlegare, fordi det siste året mitt blei ekstra gøy nettopp på grunn av dette.
– Om du vurderer å begynne å studere, vil eg absolutt tilrå deg å gjere det. Det er ei investering i deg sjølv, og det kan opne døra til ein jobb som du både trivast og har høve til å utvikle deg vidare i!