Kontakt:
- E-post
- hilde.inntjore@uia.no
- Telefon
- +47 38 14 11 46
Som viserektor arbeider ho for framleis god kvalitet og relevans i utdanningane, med vidareutvikling og synleggjering av UiAs studietilbod, og bidra til at utdanning og forsking sest i nær samanheng.
Inntjore har arbeidd ved UiA sidan 1999. Ho kjenner UH-sektoren godt, og har eit stort nettverk både nasjonalt og internasjonalt. Inntjore er samfunnsengasjert, og har stor tru på utdanning som eit verkemiddel for å skape gode samfunn. Derfor meiner ho det er viktig at utdanningane er tilpassa både dagens og morgondagens samfunn. Ho er visjonær, strategisk og systematisk i tilnærminga si, også til kompliserte sakskompleks.
Mellom 2020 og 2023 var ho dekan for lærarutdanningane ved UiA og leidde då ei av dei største utdanningane ved universitetet. Som dekan var Inntjore styreleiar for lærarutdanningane ved UiA, og ho er nestleiar i styret for fakultetet for utdanningsvitskap og humaniora ved Universitetet i Stavanger. I tillegg er ho leiar av fleire styringsgrupper for ulike satsingar og prosjekt, styremedlem i MatRic, eit Senter for framifrå utdanning ved UiA, i tillegg til nasjonale verv.
Inntjore tok initiativet til og leidde utgreiingsarbeidet for opprettinga av likestillingsstudiet ved UiA, og var sentral i etableringa av UiAs årlege likestillingskonferanse og skipinga av Senter for likestilling.
Den faglege bakgrunnen hennar er samansett med både profesjons- og disiplinutdanning. Inntjore er utdanna allmennlærar, med vekt på idrett, og har også ein historiefagleg bakgrunn. Ho har hovudfag frå UiO i 1998 og doktorgrad frå UiB i 2018 med ei avhandling om Stavanger bispedøme i perioden ca. 1250-1500.