Forskingsprosjektet er styrt av næringslivsaktøren Davidhorn, med partnarar innan forsking som inFuture, Noregs teknisk-naturvitskaplege universitet (NTNU), Universitetet i Liverpool og Universitetet i Agder (UiA).
Andre partnarar er mellom andre Oslopolitiet, Politiets sikkerheitsteneste og politiet for krigsbrotverk i Ukraina.
Det totale budsjettet for prosjektet er 42 millionar kroner. Noregs forskingsråd bidreg med 16 millionar kroner, og 5 av dei går til UiA.
Effektiv og robust KI
– Dette skal styrkje kapasiteten til politiet og effektiviteten i krisehandtering og etterforsking, seier Morten Goodwin, professor ved UiA og nestleiar ved UiAs Senter for forsking på kunstig intelligens (CAIR).
Morten Goodwin er prosjektleiar på UiAs bidrag og har hovudansvaret for å utvikle kunstig intelligens (KI) som politiet kan ta i bruk for å verte meir effektive.
Rettstryggleik for alle involverte
KI-en skal samtidig ta vare på rettstryggleik for alle involverte partar. Derfor er det viktig at den kunstige intelligensen får trene på krisehandtering og samfunnstryggleik. Med på forskinga er også professor Jaziar Radianti. Ho leiar UiAs Senter for integrert krisehandtering (CIEM) og får særleg ansvar for den biten.
– Ved CIEM har vi lang erfaring med å utvikle løysingar for politi, brannvesen og andre beredskapsaktørar. Her handlar det om å samkøyre informasjon frå ulike kjelder for å sikre at den anslvarlge tek rette beslutningar i kriser, seier Radianti.
Hurtig og korrekt søk
– Vi skal utvikle KI som skal sikre at rett informasjon vert henta ut av store og omfattande informasjonsbolkar. Her handlar det mykje om å få fleire partar til å forstå kompleks informasjon på same vis, seier Goodwin.
Han trekkjer fram samarbeidet mellom kommandorom og operative einingar som døme.
KI-en skal også kunne transkribere munnlege samtalar i sanntid, søkje hurtig og rett i store databasar, støtte avhøyr, vurdere avhøyra og bidra til intervju- og forhøyrstrening for politiet.
Prosjektet startar i januar 2026 og går fram til 2029.