Avtalen vart underteikna i Mandal 14. februar av politimeister Kjerstin Askholt og rektor Sunniva Whittaker.
Målet med avtalen er å saman bidra til berekraftige og kunnskapsbaserte tenester til befolkninga på Agder.
– Politiet har veldig relevante fagområde for universitetet. Dei kan gi praktisk erfaring for studentar innanfor fleire område, og utvikle ny kunnskap saman med både studentane og våre fagmiljø, seier rektor Sunniva Whittaker.
– Vi lever dessverre i ei verd der beredskap og tryggleik blir eit stadig viktigare område. Desinformasjon er også ein av dei store truslane. Som universitet skal vi utvikle kunnskap som skal både støtte og utfordre politiet i utviklinga av arbeidet sitt, seier Whittaker.
Frå praksis til forsking og nyskaping
Det skjer allereie samarbeid mellom verksemdene på fleire område der partane har samanfallande interesser, men no blir dette formalisert og styrkt.
– Formålet med samarbeidsavtalen er å styrkje institusjonane våre og regionen gjennom strategisk samarbeid og målretta utviklingsarbeid. Dette er svært positivt, og vi ser fram til eit vidare godt samarbeid i åra som kjem, seier politimeister Kjerstin Askholt.
Politiet og UiA skal mellom anna samarbeide gjennom:
- Praksis for UiA-studentar
- Vidareutvikling av relevante studieprogram
- Utvikling av etter- og vidareutdanningstilbod
- Forsking, nyskaping og faglege og kunstnariske utviklingsprosjekt
- Formidling av kunnskap
Arbeidet skal no gjerast konkret i ein felles handlingsplan. Avtalen strekk seg i første omgang ut 2028.