– Folk i Noreg veit ikkje så mykje om Ukraina, om EU eller om europeisk integrasjon. Med dette prosjektet ønskjer vi å bidra til å auke denne kunnskapen.
Det seier Anne Pintsch, som er førsteamanuensis på Institutt for statsvitskap og leiingsfag ved Universitetet i Agder. Ho har nyleg fått 1,79 millionar kroner frå Direktoratet for høgare utdanning og kompetanse for å gi oss meir kunnskap om Ukraina.
Tildelinga er ein del av direktoratet sitt program for Ukraina-kompetanse. Programmet skal setje norske aktørar betre i stand til å bidra til ukrainsk motstandskraft og gjenreising. Det skal også bidra til at det norske samfunnet lærer av dei ukrainske erfaringane.
Tredelt program
– Noreg har lang erfaring med å samarbeide med EU. Det er relevant for Ukraina, som på vegen til eit medlemsskap må inngå i liknande former for integrasjon som Noreg allereie har etablert med unionen, seier Pintsch.
Prosjektet har tre delar.
I den første delen skal UiA utvikle to etter- og vidareutdanningskurs om Ukraina på 2,5 studiepoeng. Desse skal rette seg mot leiarar og tilsette i norsk offentleg sektor. Det blir også ekstra forelesingar om landet for dei som tek master i leiing.
I den andre delen blir det gjesteforelesingar om Ukraina på fleire andre av UiAs studieprogram. I tillegg blir det arrangert digitale utvekslingar mellom UiA-studentar og ungdommar frå Kristiansands vennskapsby Mykolaiv i Ukraina.
I ein tredje del kjem ein ungdomsdelegasjon frå Mykolaiv til Kristiansand i mai. Dei vil då møte UiA-studentar og andre ungdommar under Demokrativeka, KRS European Youth Forum og Europakonferansen. Det vil vere fleire andre arrangement med Ukraina som tema.
Kan lære av Ukraina
– Vi håpar at dette vil bidra til at fleire her til lands får meir kunnskap om Ukraina, den demokratiske utviklinga i landet, og prosessen med EU-medlemsskap for Ukraina, seier Pintsch.
Ho ser også fram til at ungdom frå Kristiansand får jobbe saman med jamaldrande frå Ukraina.
– Dagens unge generasjon kjem til å vere leiarar om 15-20 år, og vi håpar dei kan knyte nettverk og styrkje kontaktane sine med Ukraina, seier forskaren.
Pintsch fortel at det er mykje Noreg kan lære frå Ukraina.
– Særleg når det gjeld demokratiet sine kår i krisetider, og korleis ukrainarane har jobba for å skape demokratiske prosessar i ein vanskeleg situasjon.
Prosjektet starta 1. desember i år, og varer til desember 2027.