Gjennom prosjektet BIOMANG har det blitt gjennomført ei rekke tiltak for å jobbe med FNs berekraftsmål for biologisk mangfald på UiA.
- Å vareta biologisk mangfald på campus bidrar både til undervising og forsking, eit godt læringsmiljø og til å involvere lokalbefolkninga i å bevare naturen, seier miljørådgvier Katharina Reionn Bjørnestøl.
Tanken er at campusområda fungerer som levande uteklasserom, og at eit rikt artsmangfald styrker helse, trivsel og UiAs satsing på berekraftig utvikling.
Flaggermusa er utsatt - nå har dei flytta inn på campus
Eit av tiltaka har vore å sette opp flaggermuskasser rundt på Campus Grimstad og Kristiansand, slik at flaggermusa har ein trygg stad å bu.
Tidlegare i oktober inspiserte biolog Roar Solheim flaggermuskassene på Campus Grimstad. Her blei det funne både flaggermuslort og ei lita dvergflaggermus som kvilte seg i ei av kassene.
Solheim påpeikar at det er viktig å passe på dei små dyra:
- Med den generelle nedgangen i mengda av insekt som finn stad over heile Europa, også i Noreg, er flaggermusene utsette for å miste næringstilgang. Derfor er det også viktig å overvake førekomst og bestandar av flaggermus, seier han.
Kassene blei hengde opp for å gi flygarane fleire trygge stader å bu. Inspeksjonane viser at dei har tatt kassene godt i bruk.
På Campus Kristiansand har ein sett litt mindre aktivitet enn i Grimstad, men det har vore tydelege teikn til at dei har nytta seg av desse kassene òg.
Fleire av kassene skal festast høgare i løpet av våren 2026, for å sjå om dette kan bidra til auka aktivitet.