Det siste universitetsstyremøtet i år starta med dialog med Studentsamskipnaden i Agder (SiA).
90 prosent av studentane knytta til SiA er UiA-studentar, og godt samarbeid mellom UiA og SiA er viktig for trivselen til studentane.
Administrerande direktør Pål Harv presenterte SiAs verksemd, som mellom anna består av 2.300 studentbustader, Noregs største (og truleg beste) studentkantine, bokhandel med utsal på begge campusar, to barnehagar og eitt treningssenter.
Utfordringar som vart diskuterte med styret var mellom anna studenttal, kva som skjer dersom det blir færre «campusstudentar» og fleire som følgjer samlingsbaserte eller heildigitale tilbod, manglande statleg støtte til rehabilitering av eldre studentbustader og utviklinga i helsa til studentane.
Universitetsdirektør Seunn Smith-Tønnessen og Harv avslutta dialogmøtet med å slå fast at dei to institusjonane har eit tett og godt samarbeid som lovar godt for den vidare utviklinga for studenttrivselen i Agder.
Innfører fireårige planar
For å følgje opp UiAs strategi, vedtok universitetsstyret ein fireårig plan. Planen er på overordna nivå, og er direkte knytt til måla og områda som blir vektlagde i strategien.
Denne vil dei kommande åra følgjast opp av handlingsplanar og andre prosessar som går meir konkret til verks på kva som skal gjerast for å nå målet i strategien. Fakulteta og lærarutdanningane sine eigne strategiplanar skal behandlast i universitetsstyret i januar 2025.
Strategien og planen har lagt direkte føringar på budsjettet for 2025 som også vart vedteke i same sak.
2025 – handlingsrommet sitt år
UiAs langtidsbudsjett viser klart at universitetet går mot tøffare økonomiske tider, og det ligg fast.
Likevel vedtok universitetsstyret det ein kan kalle eit normalbudsjett for 2025 utan nye kutt.
Det er ulike grunnar til at det neste året kjem med økonomisk handlingsrom. UiA har mellom anna oppnådd gode resultat som får utteljing i statsbudsjettet, har fått god utteljing i Kunnskapsdepartementets satsing på fleksible og desentrale studiar og er tildelte nokre nye studieplassar. UiA forventar også at energikostnadene blir vesentleg lågare i 2025 enn dei siste åra.
Det er særleg to større satsingar som er vedtekne, og dei knyter seg til bruk av ny teknologi og kunstig intelligens, og fleksible utdanningar.
18 millionar kroner til KI og ny teknologi
Mål nummer fire i strategien til universitetet seier at «UiA skal gå føre i effektiv, berekraftig og ansvarleg bruk av ny teknologi og nye arbeidsmåtar».
For å få dette til har universitetsstyret løyvd over 18 millionar kroner i 2025. Kvart fakultet får ein halv million kroner og lærarutdanningane får 250.000 kroner.
I tillegg blir det sett av heile 15 millionar kroner som skal brukast til felles infrastruktur og andre tiltak for å rigge universitetet til å kunne ta i bruk KI og andre nye teknologiar på ein god måte. Her blir det no ein intern prosess med fakultet og administrasjonen for å fordele desse midlane på gode tiltak.
Skal gjere fleire studietilbod fleksible
Den andre store satsinga universitetsstyret gjer handlar om å gjere studiar meir fleksible, med andre ord enklare å ta utan å vere heiltids campusstudent.
Også her får fakulteta 500.000 kroner kvar og lærarutdanningane får 250.000 kroner til å styrkje dette arbeidet. Styret set også av 6 millionar kroner til å følgje opp ein kommande plan for distriktsvennleg og fleksible utdanningstilbod, og fellestenestene får i tillegg to nye årsverk til å støtte dette arbeidet.
Nokre andre utvalde tildelingar for 2025:
- Nytt system for atletmonitorering ved Fakultet for helse- og idrettsvitskap – 2 millionar kroner
- Støtte til å søkje ny akkreditering for Handelshøyskolen ved UiA – 265.000 kroner
- Datamaskiner og infrastruktur knytt til ny spesialisering i akademisk e-sport på masternivå ved Fakultet for teknologi og realfag – 1 million kroner
- Eit nytt årsverk til IT-avdelinga innan utvikling av tenesteutviklingsplattforma Service Now
- Styrking av studiestart, under dette fadderopplæring og «studenthub» – 150.000 kroner
- Oppfølging av dei tverrfaglege områda i UiAs strategi – 800.000 kroner
- Gjennomføring av ny kandidatundersøking – 800.000 kroner
- Midlar som blir sette av for at styret kan følgje opp UiAs strategi, inkludert den kommande nye handlingsplanen for kommunikasjon – 4 millionar kroner
- Midlar som blir sette av til investeringar i inventar og utstyr til UiAs del av det kommande Vitensenteret ved Campus Kristiansand – 5 millionar kroner (totalt skal det brukast 9 millionar kroner på inventar og utstyr, og dessutan 1 million kroner til opningsutstillinga i 2026)
Dette er berre eit utdrag, og fullstendige saksdokument vil gi det totale biletet.
Andre utvalde vedtak
- Styret vedtok instruks for dagleg leiing, arbeidet til universitetsstyret og saksbehandling og instruks for forretningsorden ved kollegiale organ
- Universitetsstyret delegerte ansvaret for å utnemne medlemmer av UiAs skikkethetsnemnd til rektor
- Universitetsstyret behandla tilsetting av ny dekan ved Fakultet for teknologi og realfag. Ny dekan vert offentleggjort på UiA.no seinare
- Universitetsstyret behandla saka om nye meritterte undervisarar ved UiA. Resultatet vert offentleggjort på UiA.no seinare