Kunnskapsministeren møtte morgondagens lærarar: – De skal bli den læraren elevane hugsar

Kari Nessa Nordtun besøkte UiA Campus Kristiansand i studiestartveka og møtte førsteårsstudentane på grunnskolelærarutdanningane. I ein engasjert time diskuterte ministeren alt frå mobilfrie skolar til femteåret som praksisår med studentane.

Bildet viser kunnskapsministeren som tar selfie med tre grunnskolelærerstudenter

Kunnskapsminister Kari Nessa Nordtun tar seg tid til selfies og uformell snakk med grunnskolelærarstudentane i etterkant av det formelle programmet.

Av Vibeke Faye Wevle

Publisert 15. aug. 2025 - Sist endra 12. des. 2025

Når kunnskapsminister Kari Nessa Nordtun set seg ned med Universitetet i Agders aller ferskaste grunnskolelærarstudentar, handlar det om meir enn høflegheitsfrasar. Det handlar om framtidas skole.

– Vi har vel alle ein lærar vi hugsar ekstra godt, som såg oss og hadde tru på oss. Nå er det dykk som snart skal bli den læraren for mange små og litt større elevar, sa Nessa Nordtun til dei engasjerte studentane på Campus Kristiansand.

Bildet viser kunnskapsministeren som snakker foran en stor gruppe studenter i undervisningsamfi — Kunnskapsministeren møtte grunnskolelærarstudentane på UiA, som visste å nytte høvet til å kome i dialog med den øvste politiske leiaren for yrka deira.

Balanse mellom skjerm og bok

Under besøket tok ministeren opp fleire av dei mest brennande temaa i dagens skoledebatt. Ho understreka kor viktig det er å gjere tydeleg rolla til læraren og trekte også fram balansen mellom digitale verktøy og tradisjonelle læringsmetodar.

– Pedagogiske opplegg der det blir brukt rett verktøy til rett tid, då utnyttar vi dei moglegheitene vi har, fortalde ministeren, og trekte samtidig fram betydinga av skolebiblioteka og samanhengen mellom lese- og skriveferdigheiter og digital kompetanse.

Nessa Nordtun snakka også om arbeidet til regjeringa med mobilfrie skolar, eit tema som har skapt mykje debatt i utdanningssektoren.

Studenter stilte kritiske spørsmål

Førsteårsstudentane let ikkje sjansen gå frå seg til å stille kritiske og gjennomtenkte spørsmål til ministeren. Studieleiar Anne Elmies-Vestergren hadde førebudd studentane i forkant, og dialogen som følgde viste at dei komande lærarane allereie tenker djupt om yrket som ventar.

Studentane ville vite meir om korleis ein kan sikre at skjermbruk best kan brukast til kunnskap og utvikling framfor underhalding. Dei stilte også spørsmål om femteåret i lærarutdanninga – kan dette gjerast om til eit reint praksisår i skolen? Spesialpedagogikk var eit anna tema studentane ønskt å diskutere. Korleis kan spesialpedagogikk løftast meir i samanheng med faga?

Bildet viser en stor gruppe studenter i undervisningsamfi — Studieleiar Anne Elmies-Vestergren leidde spørsmålsrunden, og var veldig stolt av dei heilt ferske grunnskolelærarstudentane og engasjementa deira i møte med kunnskapsministeren.

Nasjonal kvalitet uavhengig av økonomi

Bildet viser overrekkelse av håndlaget oppmerksomhet til kunnskapsministeren, minster med hånda på hjertet — Merksemda til barnehagelærarstudenten, som også skal føre med seg lykke, blei varmt tatt imot av ministeren.

Eit av dei mest utfordrande spørsmåla kom når studentane spurde om korleis ein kan sikre nasjonal kvalitet i skolane, uavhengig av kvar enkelt kommunes økonomi. Eit spørsmål som viser at dei komande lærarane allereie forstår kompleksiteten i det norske utdanningssystemet.

Besøket blei avslutta på ein hjartevarm måte då ministeren fekk med seg ei handlaga helsing frå ein barnehagelærarstudent – eit lite symbol på den omsorga og kreativiteten som pregar lærarutdanningane ved UiA.

For dei ferske grunnskolelærarstudentane var møtet med kunnskapsministeren meir enn berre ein annleis start på studieåret. Det var ei påminning om det viktige oppdraget som ventar dei i norske klasserom.

Gruppe mennesker ute på campus med kunnskapsministeren i midten — Før møtet blei avslutta, var det også tid til meir uformell prat og oppfølging. Både med studentar og tilsette.