Førsteamanuensis Mariam Kharatyan tok over ansvaret for dei klassiske lunsjkonsertane på UiA i 2020. Før henne var det klaver-professor Tellef Juva som organiserte konsertane.
Kharatyan fortel at lunsjkonsertane truleg har like lange tradisjonar som den klassiske musikkutdanninga, som blei etablert med Agder Musikkonservatorium i 1965. I år er det 20 år sidan lunsjkonsertane blei lansert som ein fast konsertserie etter at musikkonservatoriet blei del av Høgskolen i Agder.
– Den forma som konsertane har no, med fire eller fem profesjonelt produserte konsertar kvart semester, har 20-årsjubileum i år. Det synest vi fortener litt ekstra merksemd, seier ho.
– Viktig for studentane
Hausten 2024 er det duka for fire klassiske lunsjkonsertar i Sal 1 i Sigurd Køhns hus. Den første konserten er allereie onsdag 11. september. Alle konsertane er gratis og dei er opne for alle.
– Lunsjkonsertane er svært viktige for dei klassiske musikkstudentane på UiA. Vi får mogelegheit til å få erfaring med kjensler og mekanismar som i mindre grad gjer seg gjeldande på øvingsromma, seier Nils Arne Halle Erstad.
Han er masterstudent ved Institutt for klassisk musikk og musikkpedagogikk og spesialiserer seg i klassisk song. Å opptre på dei klassiske lunsjkonsertane er ein naturleg del av utdanninga. Halle Erstad set pris på å kunne teste eigne kunstnarlege val og konsept på eit større publikum.
– Lunsjkonsertane har låg terskel og det er fokus på ei positiv tilnærming. Dette kan gi større tryggleik i møtet med andre konsertarenaer som ventar både under og etter utdanninga.
– I tillegg er lunsjkonsertane opne for alle som vil høyre og det er positivt for både publikum og utøvarar, seier Halle Erstad.
Mange høgdepunkt på haustprogrammet
Kharatyan fortel at lunsjkonsertane har utvikla seg mykje og at nivået blir høgare for kvart semester.
– Min tanke har vore å skape ein meir heilskapleg konsertserie. Lunsjkonsertane skal vere ein ekte konsertsituasjon for studentane og publikum. Produsentane ved fakultetet sikrar at lyd og lys held ein profesjonell standard, seier ho.
Dei klassiske musikkstudentane har ei utøvande eksamensform. Lunsjkonsertane gir derfor viktig trening før eksamen. Studentane taklar nervøsitet ulikt, og øving gjer meister. Saman med Kharatyan lærer studentane korleis dei kan spele på lag med kroppen og bruke den til sin fordel.
Alle instrumentgrupper er representerte under lunsjkonsertane.
– Likeverd er eit svært viktig prinsipp for oss på instituttet. Alle studentar, uansett nivå, skal få sjansen til å opptre.
Nokre studentar vel å framføre solo, andre går saman i ensemble. Kharatyan og pianist-kollega Cordula Hacke bidrar med akkompagnement av topp kvalitet.
- Kvar student har eit eige særpreg og ein unik musikalsk identitet. Dette skaper breidde og variasjon, seier Kharatyan.
– Publikum kan vente seg mange høgdepunkt denne hausten.
Bonuskonsert med CreaTeME
I tillegg til dei fire klassiske lunsjkonsertane, er det planlagt ein bonuskonsert i samarbeid med UiAs CreaTeME og studentar og kollegaer frå Institutt for rytmisk musikk. Dette blir ein tverrfagleg lunsjkonsert med live electronics, inspirert av folkemusikk. Bonuskonserten blir annonsert om kort tid.
Kharatyan meiner det er viktig at studentane lærer å utforske gjennom denne typen tverrfaglege samarbeid.
– Kunstnarleg og musikalsk utvikling gir veldig mykje glede. Det er viktig at studentane ser verdien av å ha eit ope sinn og å utvide eigen smak og utforske andre sjangrar. Det er med på å høgne standarden, seier Kharatyan.