Internasjonalisering heime i grunnskulelærarutdanningane
I juni kom beskjeden om tildeling av midlar frå Program for utdanningskvalitet ved UiA (PRUK) til prosjektet om «Internasjonalisering for lærarstudentar gjennom studentaktive og framtidsretta arbeids- og vurderingsformer» som, mellom anna, skal gje grunnskulelærarstudentar internasjonal erfaring «her heime».
Artikkelen er mer enn to år gammel, og kan inneholde utdatert informasjon.
Prosjektet er eit samarbeid mellom faglærarar ved Fakultet for humaniora og pedagogikk og tilsette ved Avdeling for lærarutdanning. Bidragsytarane er Eli-Marie Drange ved Institutt for framandspråk, Aleksandra Lazareva og Irina Amdal ved Institutt for pedagogikk og Kjerstin Breistein Danielsen ved Avdeling for lærarutdanning. I tillegg skal dei ha med seg studentmedarbeidarar frå Undervisningsverkstaden.
Kjerstin Breistein Danielsen. Foto: UiA
– Vi ynskjer at lærarstudentane skal få internasjonal erfaring gjennom å jobbe saman digitalt og å dela eiga erfaring med lærarstudentar frå andre land og høve til å utvikla eit personleg læringsnettverk som dei kan byggja vidare på i studia og i yrkeslivet, seier Danielsen (bildet til høgre) som er koordinator for prosjektet.
Vidare skal studentane få erfaring med innovative digitale former for arbeid og vurdering som dei kan nytta i eiga undervisning med elevar, og dei skal få sentrale roller i arbeidet med å skapa gode fysiske og digitale læringsmiljø for medstudentar og høve til å delta i implementering og leiing av ein internasjonal MOOC - Massive Open Online Course er fleksible kurs som er gratis og tilgjengeleg for alle.
Internasjonalisering på ein annan måte
Det er eit mål i grunnskulelærarutdanningane at studentane skal få internasjonale perspektiv. For lærarstudentane betyr internasjonalisering ofte eit semester eller ein praksisperiode i utlandet, men langtfrå alle studentane har eit lengre opphald utanfor Noregs grenser som ein del av utdanninga si. Derfor er det viktig å ivareta internasjonale perspektiv i utdanningane også «her heime», og koronapandemien denne våren har vist at vi må omstilla oss og finna nye måtar å sikre internasjonaliseringa på.
Dekan for lærarutdanningane, Hilde Inntjore, synest tildelinga er veldig gledeleg:
– Eg ser fram til å følgja utviklinga av prosjektet. Det er eit godt forarbeid som er gjort og eg gratulerer dei involverte med tildelinga!
Idéverkstader, internasjonal MOOC og samlingar
Ein av dei planlagde aktivitetane er å innpassa modular frå den internasjonale MOOC-en «The Networked Teacher – Teaching in the 21st Century», som er eit resultat av ITELab-prosjektet, som både Drange og Danielsen var med på. MOOC-en er retta mot lærarstudentar og nyutdanna lærarar i Europa, og gjev høve til å utvikla sitt profesjonelle læringsnettverk gjennom å løysa praktiske oppgåver og refleksjonsoppgåver saman med andre lærarstudentar i Europa.
Førsteamanuensis Eli-Marie Drange. Foto: UiA
Det er òg lagt opp til at lærarstudentar frå fleire europeiske lærarutdanningsinstitusjonar skal ha samlingar i sanntid digitalt. Studentmedarbeidarar frå Undervisningsverkstaden skal væra med på å leggja til rette for fysiske og digitale gruppesamlingar for studentar som følgjer MOOC-en.
– Vi skal i hovudsak gjennomføra aktivitetane som ein del av emna i pedagogikk og elevkunnskap som ligg i haustsemesteret. Vi vil også ha nokre aktivitetar i emne i framandspråk, så prosjektet vil gå over tre semester med oppstart hausten 2020 og avslutning hausten 2021, avsluttar Eli-Marie Drange (bildet til venstre), som er faglærar i spansk.