Studentbedrift vann pris for beste berekraftige forretningsidé

Konkurransen for berekraftige forretningsidéar skal hjelpe fram gründarar på Agder som har nye idéar. Løysinga til Pleco Marine AS handlar om å dyrke og prosessere mikroalgar til bruk i oppdrettsnæringa.

– Å vinne konkurransen er ei anerkjenning av at andre trur på det vi jobbar med. Som studentgründarar i oppstartsfasen set vi pris på all hjelp, seier Tobias Øverlid i Pleco Marine.

Prisen blir delt ut av Business Region Kristiansand. Vinnarane får mellom anna fri kontorplass i eitt år, mentorordning frå Innovasjon Noreg og rådgjeving for vidare forretningsutvikling.

Pleco Marine tek imot prisen. Benjamin Torvund (t.v.), Karl Wiik, Eirik Ullenrød, Tobias Øverli, Jørgen Henriksen fra Pleco Marine. Fylkesordfører Arne Thomassen, Juryen: Kristine Ribe-Christensen (Innoventus Sør), Geir Askvik Haugum (Business Region Kristiansand) og Helge Hammersbøen Regionbanksjef DNB).

Masterprogram for entreprenørar

Pleco Marine blei starta av studentar på Universitetet i Agder sitt masterprogram i entreprenørskap, Shift. Her jobbar studentar med ulik fagbakgrunn i lag for å gjere gode idéar til berekraftig forretning.

– Vi hadde ikkje eksistert om det ikkje var for Shift. Å sette saman ulike menneske frå ulike kompetanseområde og fagbakgrunnar gjer det mogleg å utvikle heilt nye idear, seier Øverlid.

To av studentane i Pleco har bakgrunn i økonomi. Ein av dei har studert innovasjon og leiing, ein har studert marknadsføring, medan Øverlid har ein bachelorgrad i historie.

– Shift kombinerer studia og etablering av ny bedrift på ein måte som gjer det enklare å kombinere dei. Eksamensoppgåvene handlar om ting som er med å gjere bedrifta di levedyktig. Den kombinasjonen er gull verdt, seier han.

Imponerte juryen

Ifølgje juryen for konkurransen har Pleco ein forretningsidé med stort potensial. «Moglegheita for å realisere ideen kjem med industrielle partnarar, team og ein god finansiell plan», skriv juryen i grunngjevinga for prisen.

Øverlid seier at planane til Pleco no er å halde fram med utvikling og forsking. Dei ønskjer òg å starte eit pilotanlegg hos ein oppdrettar, samstundes som at dei hentar inn fleire midlar til bedriften.

– Vi har òg eit halvår igjen av studia, så vi kombinerer dette med skole og masterskriving, seier Øverlid.

Pleco Marine var også ei av dei tre Shift-bedriftane som fekk 100.000 kronar i støtte frå Innovasjon Norge i mars.