Sterk auke i internasjonal studentmobilitet
Frå 1999 til 2006 auka talet på studentar som studerte ved eit universitet i eit anna land enn sitt eige frå 1,54 millionar til 2,40 millionar. Det er ein auke på 56 %. Det er i fyrste rekkje blant asiatiske studentar auken har vore stor, blant desse er auken på heile 93 % i løpet av desse 8 åra.
Det er tal frå Agence Campus France, den franske nasjonale organisasjonen for høgare studiar i utlandet, som viser dette.
Det er dei 400.000 kinesiske studentane som utgjer den store gruppa av asiatiske studentar i utlandet. India har ca. 130.000 studentar i utlandet, Sør-Korea ca. 90.000.
Dei fleste utanlandsstudentar studerer i USA, nesten 600.000. Ikkje meir enn 40.000 amerikanske statsborgarar studerer i utlandet. Storbritannia, Frankrike, Tyskland og Australia er andre store vertsnasjonar for utanlandsstuderande.
Målt i høve til det totale talet på studentar i dei einskilde land betyr likevel ikkje utanlandsstudentane i USA så mykje. Dei utgjer 3 % av studentane ved amerikanske universitet. I Australia er 23 % av studentane utlendingar, dei fleste av desse frå asiatiske land.
Den største delen amerikanske studentar i utlandet vel Storbritannia. Det gjeld nesten halvparten av dei i underkant av 40.000 amerikanske utanlandsstudentane.
Statistikken er også omtalt i University World News 12. oktober 2008.
Kommentarer
Universitetet i Agderpost@uia.no
Telefon: +47 38 14 10 00 Fax: +47 38 14 10 01
