Nesten berre fornøgde kandidatar

Sjølv om arbeidsløysa har auka ein del dei siste åra, karakteriserer NIFU STEP på grunnlag av undersøkinga arbeidsmarknaden for nyutdanna akademikarar som relativt godt.

Litt under halvparten av dei nyutdanna kandidatane med høgare grad hadde hausten 2009 oppnått fast, relevant heiltidsjobb. 22,5 prosent hadde mellombels, relevant heiltidsjobb. Litt over 10 prosent hadde relevant deltidsjobb. 19 prosent hadde ikkje relevant arbeid, i forhold til utdanninga, eit halvt år etter eksamen. Dette inneber at nokon fleire, omtrent 3 prosent, enn for kullet frå våren 2007 ikkje hadde relevant jobb. I forhold til utviklinga i arbeidsmarknaden vurderer NIFU STEP denne utviklinga som betre enn forventa.

Størst var denne "mistilpassinga" blant humanistane og blant kandidatar i primærnæringsfag. Der var den mellom 27 og 28 prosent. Men innanfor dei einskilde faggruppene varierer mistilpassinga mykje.

Kandidatundersøkinga har også spurt kandidatane om ei vurdering av studia og lærestadene. Kandidatane frå alle studia er stort sett ganske fornøgde med studium og lærestader, samla sett. Meir enn 90 prosent av kandidatane frå høgare grads studiar er svært eller litt nøgde med utdanningane sine, 60 prosent er svært nøgde.

Her skil allmennlærarstudentane seg ut. Blant dei er berre 75 prosent litt eller svært nøgde, og berre 29 prosent svært nøgde.

Berre 20 prosent av allmennlærarkandidatane er svært nøgde med lærestaden, mot 46 prosent av kandidatane frå høgare grads studium.

Berre 11 prosent er svært nøgde med det faglege innhaldet i studiet, mot 47 prosent av kandidatane frå høgare grads studium.

Berre 8 prosent er svært nøgde med undervisningskvaliteten, mot 25 prosent av høgare grads kandidatar.

Og berre 9 prosent av allmennlærarkandidatane er svært nøgde med utdanninga sin relevans, mot 36 prosent blant høgare grads kandidatar.

Kandidatundersøkinga kan lastast ned frå nettsidene til NIFU STEP.

　

　

Kommentarer