Statsråden på energi-visitt

Visitten er eit ledd i regjeringas "Rundt i landet"-prosjekt - der statsrådane turnerar heile landet for å bli kjent med lokale tilhøve. Det er fylkeslaga til regjeringspartia som er arrangørar av Aasland-visitten.

Kompetanseutvikling innan energi og klima

Statsråden kjem til UiA etter at ho fyrst har hatt eit møte med Agder Energi, for å høyre nærare om deira satsing på fornybar energi og vindmøller.

Klokka 12:30 startar møtet på Kampus Kristiansand på Gimlemoen - i styrerommet i 7. etasje i Henrik Wergelands hus.

Fokuset er på kompetanseutvikling innan energi og klima og potensialet på Agder.

Rektor Torunn Lauvdal og dekan Frank Reichert frå Fakultet for teknologi og realfag orienterer om UiA-satsinga på fornybar energi og samarbeidet med næringslivet. Direktørar frå Elkem Solar, National Oilwell, Aker Solutions og TEKNOVA gir korte kommentarar før statsråden orienterer og kommenterer frå sin ståstad.

Blant anna vil Tora Aasland kommentere korleis klimaforskingsmidlar skal brukast til å byggje opp kompetansemiljø mange stader i landet.

Det er satt av to timar til møtet. Vonaleg vil forskings- og høgre utdanningsminister Tora Aasland få med seg mange friske og gode tankar tilbake til Oslo, der ho innleiar "Energiuka" som arrangerast i regi av Norges forskningsråd, Innovasjon Norge og ENOVA under oppstarten onsdag.

Kommentarer