Agderseminaret 2008 i bokform

Frå 1970-talet og fram til 2001 arrangerte historikarmiljøet ved Agder distriktshøgskole og Høgskolen i Agder årlege sommarseminar med ulike regionalhistoriske tema.

Seminara var viktige for formidlinga av ny regionalhistorisk forsking frå og om Agder, og resulterte bl.a. i ei rekkje artikkelsamlingar. Frå 2007 tok det historiefaglege Forskernettverk Agder opp igjen tradisjonen, ved årleg å arrangere Agderseminaret, som haustseminar. I 2007 var emnet Egdene og de ti bud, om moral og rettskjensle på Agder frå 1600-talet til i dag. Samlinga av artiklar frå seminaret blei utgitt året etter, redigert av Anne Tone Aanby. I 2008 var seminaret vigt historiske perspektiv og aktuelle utfordringar for "regionen", og det siste seminaret i rekkja, arrangert ved Aust-Agder kulturhistoriske senter i Arendal 16. og 17. oktober, hadde tittelen Sørlandsk kultur - mangfoldet og motsetningene. Sjølv om kjernen i foredraga framleis er prega av historiske tema, har seminara med seg aktuelle perspektiv, som gjer at historia blir ein del av ein notidig kontekst. Det gjer truleg seminara interessante for fleire, og tydeleggjer også at interessa for historiske tema ofte har samtidig motivasjon.

UiA har mange medarbeidarar som i forskinga si er oppteken av Agder, og av regional historie og regional utvikling. I artikkelsamlinga frå Agderseminaret 2008 er fleire av dei representerte. Utanom professor Niemi frå Universitetet i Tromsø har alle av bidragsytarane tilknyting til landsdelen.

Fyrsteamanuensis Jan Erik Grindheim (Institutt for statsvitskap og leiingsfag) skriv om europeisk integrasjon og regionale endringar i Europa, og professor Einar Niemi (Universitetet i Tromsø) om oppbygginga av Nord-Noreg som ein moderne region.

Stipendiat Dag Hundstad (Universitetet i Bergen), statsarkivar Kjell J. Bråstad ved Statsarkivet i Kristiansand og direktør ved Aust-Agder regionalhistoriske senter, Kjell-Olav Masdalen, har eit historisk lys på Agder. Hundstad ser på framvoksteren av ei sørlandsk sjølvforståing på 1900-talet, Bråstad ser på Agder som ein del av ein større regional samanheng i Skagerak-Kattegat-området, og Masdalen vurderer Agder som geografisk og administrativ eining i historisk tid. Tredje del av artikkelsamlinga ser framover. Professor Arne Isaksen (Institutt for arbeidsliv og innovasjon) og seniorforskar James Karlsen (Agderforskning) ser på korleis det skjer prosessar i næringslivet som stimulerer til utvikling av ein felles økonomisk region på Agder. Dekan Jon P. Knudsen (Fakultet for økonomi og samfunnsvitskap) skriv om dei politiske utfordringane for Agder som region.

Universitetet i Agder skal vere eit førebilete for korleis ein utdannings- og forskingsinstitusjon kan vere aktiv medspelar i eigen region, heiter det i UiAs nyleg vedtekne strategiplan. Ei artikkelsamling som drøfter og problematiserer regionsomgrepet og førestellinga om ein Agder-region bør interessere mange som er oppteken av universitetet si rolle i "regionen".

Kommentarer