Strategisk plan for Universitetet i Agder 2010 - 2015

Samfunnsoppdraget

Universitetet i Agder er ein statleg institusjon som skal gi høgare utdanning, drive forsking og utviklingsarbeid, formidle kunnskap om verksemda og det faglege arbeidet sine metodar og resultat, og medverke til utviklinga av samfunnet.

Førebilete

Universitetet i Agder finn viktige trekk til profilen sin frå nye europeiske universitet som er nært knytt til regionen sin, som er aktive i innovativ verksemd, og nyskapande i bruken av pedagogiske verkemiddel og metodar.

Verdigrunnlag og organisasjonskultur

Likeverdet åt menneska skal prege den etiske grunnhaldninga hos studentar og tilsette ved Universitetet i Agder. Det skal utviklast ein institusjon bygde på den demokratiske og humanistiske kulturarven. Universitetet skal pregast av rausheit og toleranse, respekt for andre og krav til intellektuell ærlegdom.

Likeverd skal også prege universitetet sitt arbeid for likestilling mellom kjønna. Ved Universitetet i Agder skal det arbeidast målmedvite for jamnare fordeling og meir lik løn mellom kjønna i alle stillingskategoriar. Universitetet skal aktivt søkje å gjere fordelinga mellom kjønna meir lik på alle studia.

Universitetet i Agder skal leggje vekt på medvitsgjering om lokale og globale miljøutfordringar; i drift og vedlikehald av universitetet sine bygningar og lokale, i utviklinga av institusjonen, i dei tilsette og studentane si reiseverksemd, og i den faglege og administrative verksemda generelt.

Ved Universitetet i Agder skal det utviklast byrgskap over eigne og andre sine resultat. Det er viktig å vise lovord og engasjement når universitetet som institusjon, enkeltmiljø eller enkeltpersonar visar framgang og oppnår gode resultat.

Fagleg og organisatorisk openheit er sentrale verdiar for akademisk arbeid. Universitetet skal vidareføre og utvikle desse verdiane. Openheit og gjensidig respekt skal også prege samarbeidet med tenestemannsorganisasjonane. På same måten som leiinga ved universitetet skal opptre på ein lojal måte på vegner av institusjonen og dei tilsette, skal den einskilde medarbeidaren hjelpe til å oppfylle universitetet sine oppgåver og målsetjingar. Leiarar på alle nivå har eit særleg ansvar for at alle medarbeidarar skal oppleve å bli høyrde og sett.

Ved Universitetet i Agder skal det leggjast vekt på å utvikle kultur for endring og innovasjonsevne, utvise fleksibilitet og systematisk samle erfaringar i organisasjonen. Endring stiller krav til at alle tilsette systematisk utviklar kompetansen sin. Universitetet skal leggje forholda til rette for slik kompetanseoppbygging.

Det blir kravt vilje, disiplin, respekt og tillit frå tilsette, studentar og ein heil landsdel om Universitetet i Agder skal lukkast i målsetjingane sine. Samtidig blir det hardt kravt arbeid og samarbeid internt, med andre utdannings- og forskingsinstitusjonar, og med samfunnet generelt.

Strategiske mål

Universitetet i Agder skal innan 2015 utvikle og bli kjent for

• fag- og studiemiljø som er blant dei beste i landet
• fleire forskingsmiljø som er leiande i landet
• si nære tilknyting og samhandling med regionen
• si sterke internasjonale tilknyting
• sin innovative bruk av teknologi og kommunikasjonsmedium

Universitetet i Agder skal ha fag- og studiemiljø blant dei beste i landet

Studieprogramma og læringsmiljøa ved UiA skal vere knytte til det fremste i forsking og utviklingsarbeid, ha eit nært forhold til det praktiske livet og samfunnet utdanningane skal førebu til, og gi eit læringsutbyte som er godt og hevdvunne. Ved UiA skal studentane få kunnskap om faga sine forskingsmetodar gjennom deltaking i forskingsarbeid, og kunnskap om arbeidslivet dei skal ut i etter enda studium. Gjennom studia skal studentane få kjennskap til andre fagområde enn sitt eige, og få trening i samarbeid på tvers av profesjonar og fagområde.

Undervisnings- og utdanningskvaliteten ved UiA skal bl.a. kome til uttrykk ved at det på fleire fagområde er aktuelt å søkje status som Senter for framifrå undervisning/utdanning (SFU).

Attraktive studium skal sikre ei god og veksande søkning til universitetet, og vere med på å sikre det økonomiske grunnlaget for kvalitetsutviklinga ved institusjonen.

Innan 2015 skal UiA vere blant dei tre beste universiteta i landet på nasjonale rankingar av studenttilfredsheit med fag- og studiemiljø. Studieprogramma skal i aukande grad ha samarbeid med verksemder som er relevante for studiet. Ein aukande del av studentane i Noreg skal velje UiA. Minst eitt av dei planlagga sentera for framifrå undervisning/ utdanning skal liggje ved UiA.

Universitetet i Agder skal utvikle forskingsmiljøa og leggje til rette for forsking som er leiande i landet

UiA skal ha aktive forskingsmiljø på alle fagområde ved universitetet, og skal på nokre utvalde område oppnå status som nasjonalt leiande. Universitetet har eit særleg ansvar for å utvikle forskarutdanning og gode forskingsmiljø innanfor profesjonsområda institusjonen utdannar til.

Universitetet skal utføre forskings- og utviklingsoppgåver som blir etterspurde lokalt og i ein større samanheng. Forskinga ved UiA skal byggjast opp både med eigeninitiert forsking og oppdragsforsking. UiA skal gjennom forskinga og formidlingsverksemda si vise at universitetet tek medansvar for utviklinga av regionen, og skal vere ein aktiv bidragsytar i regionale medium og andre viktige forum for utviklinga i landsdelen.

God forsking er internasjonal. Uavhengig av om forskingsobjektet er lokalt eller globalt, skal forskinga vurderast etter ein internasjonal målestokk. UiA skal leggje til rette for publisering i hevdvunne norske og internasjonale kanalar, og gi synlege bidrag til internasjonal forsking.

God forsking er i stadig større grad prega av samarbeid internt i institusjonane og over institusjons- og nasjonsgrenser. UiA skal oppmode til og leggje til rette for forskingssamarbeid over fag- og profesjonsgrenser, med andre institusjonar og internasjonalt. UiA skal delta i nasjonale og internasjonale forskarskular.

Gode forskingsmiljø må tilførast tid og ressursar for å utvikle seg. UiA skal prioritere arbeidet for ei offentleg finansiering av dei nye universiteta på linje med dei etablerte institusjonane. UiA er likevel avhengig av ein monaleg vokster i den eksterne forskingsfinansieringa. Det skal leggjast til rette for at sentrale forskingsmiljø ved UiA får prosjektstønad frå EU. UiA skal gi god administrativ stønad til utarbeiding av søknader om norsk og internasjonal forskingsfinansiering.

Innan 2015 skal UiA ha fordobla talet på publiseringspoeng i forhold til 2008. Minst 70 % av dei tilsette i undervisnings- og forskarstillingar skal ha fyrstekompetanse/ professorkompetanse. Minst eitt forskingsmiljø ved UiA skal ha blitt Senter for framifrå forsking. UiA skal vere blant dei leiande i landet innanfor område av profesjonsfagleg forsking.

Universitetet i Agder skal vere eit førebilete for korleis ein utdannings- og forskingsinstitusjon kan vere aktiv medspelar i eigen region

UiA skal yte aktivt til regionale nettverk og innovasjonssystem som er relevante for arbeidslivet i offentlege og private verksemder i regionen. UiA skal bidra til utvikling av gode samarbeidsmodellar med organisasjonar og arbeidsliv, og skal i samarbeid med regionale aktørar gjennomføre forskings- og utviklingsarbeid av høy internasjonal kvalitet.

Innan 2015 skal alle fagmiljøa ved UiA drive etter- og vidareutdanning som er tilpassa etterspørsel og behova i regionen. UiA skal delta i internasjonale forskingsprosjekt i samarbeid med andre regionale aktørar. Tilsette frå alle fagmiljø skal vere godt synlege i den offentlege debatten og i populærvitskapleg formidling av eige forskingsarbeid i regionale medium.

Universitetet i Agder skal ha ei sterk internasjonal forankring

Eit moderne europeisk universitet er prega av openheit, nær kontakt med samfunnslivet, internasjonal orientering og aktivt samarbeid med andre utdannings- og forskingsinstitusjonar. UiA skal saman med næringsliv, kulturinstitusjonar og andre i landsdelen delta på internasjonale arenaer for å yte til utviklinga av regionen som eit ope, utoverretta samfunn. UiA skal søkje samarbeid med og lære av utanlandske utdannings- og forskingsinstitusjonar som har ei nær tilknyting til regionen sin.

Universitetet kan berre utvikle og bevare høg kvalitet på studium og fagmiljø ved å vere del av det internasjonale faglege, akademiske miljøet. UiA skal vere internasjonalt orientert. Alle studieprogram skal innehalde globale dimensjonar. Det skal utviklast fleire studieprogram med undervisning på engelsk. Undervisning på engelsk er også viktig for å gjere norsktalande studentar kjende med internasjonal terminologi og uttrykksmåte innanfor fagområdet. UiA skal ha gode internasjonale samarbeidspartnarar, og leggje til rette for mobilitet, både for studentar og tilsette.

UiA skal styrkje fagområda der universitetet kan utvikle særleg kompetanse på internasjonale og globale spørsmål. Fleire av desse fagområda skal bli hevdvunne kompetansemiljø nasjonalt og internasjonalt.

Campusområda til universitetet i Grimstad og Kristiansand skal pregast av institusjonen si internasjonale orientering. Studentmiljøet og arbeidsmiljøet skal spegle at mange av studentane og dei tilsette har internasjonal bakgrunn. Det skal leggjast til rette for bruk og opplæring i framandspråk. Engelsk skal brukast som kommunikasjonsspråk sidestilt med norsk i mykje undervisning og informasjonsarbeid.

Innan 2015 skal UiA ha formalisert samarbeid med utanlandske utdannings- og forskingsinstitusjonar som har ei nær tilknyting til regionen sin. UiA skal auke talet på inn- og utreisande utvekslingsstudentar til minst 10 % av studenttalet. UiA skal på alle fakulteta ha tilbod om engelskspråklege masterprogram. Alle bachelor- og masterprogram skal ha delar av undervisninga på engelsk. Viktig informasjonsmateriale til studentar og tilsette skal liggje føre på engelsk der det er relevant. Universitetet skal ha fag- og forskingsmiljø som er så gode og kjende at dei tiltrekkjer seg studentar og fagpersonar internasjonalt.

Universitetet i Agder skal vere innovativt i bruk av teknologi og kommunikasjonsmedium

Eit moderne universitet nyttar seg både av ny teknologi og meir tradisjonelle kommunikasjonsformer i læringsprosessar, forsking og kunnskapsformidling. UiA skal i stigande grad ta i bruk digitale medium og utvikle god metodikk for bruk i studium, forsking og formidling, og i samhandlinga med omverda. Det skal skje ved oppbygging og stimulering av eigne fagmiljø pedagogisk, teknologisk og systemteknisk, og ved å utvikle samarbeid om teknologi- og metodeutvikling. UiA skal vere tilknytt samarbeidande organ for universitet, høgskular og andre forskingsinstitusjonar. Eit særleg nært samarbeid om verksemd og strategi skal utviklast med dei offentlege høgare utdanningsinstitusjonane som ligg geografisk nærmast; Universitetet i Stavanger, Aalborg Universitet og Høgskolen i Telemark.

Innan 2015 skal minst 80 % av den faglege publiseringa ved UiA gjerast digitalt tilgjengeleg i opne publiseringsarkiv.Innanfor alle fagmiljø skal det arbeidast med utvikling av digitale læremiddel. UiA skal årleg stå som arrangør av ein fagleg konferanse som blir kjend som eit viktig forum for bruk av digitale medium og ny teknologi i undervisning, forsking og formidling.

Del/Tips: