Strategiplan for Universitetsbiblioteket i Agder

Hovudmål

Universitetsbiblioteket i Agder (UBA) skal vere ein aktiv bidragsytar til forsking og læring ved Universitetet i Agder. UBA skal delta aktivt i kunnskapsutviklinga ved å stille samlingar, kompetanse og tenester av høy kvalitet til rådvelde for studentar, tilsette og samfunnet rundt. Biblioteket skal fungere som ein god læringsarena og eit kompetansesenter for bruk av informasjonsressursar. UBA skal vere eit hevdvunne forskingsbibliotek som deltek i den lokale, regionale, nasjonale og internasjonalen biblioteknettverket.

Fokus

Service, kvalitet, profesjonalitet og engasjement skal kjenneteikne UBA Som universitetet er UBA oppteke av systematisk kompetanseoppbygging av den einskilde medarbeidaren og av biblioteket som organisatorisk eining. UBA skal, som universitetet, vise byrgskap over eigne og andres resultat, og skal i verksemda si vere prega av openheit, lojalitet og samarbeid.

Brukarorientering

Ved å stille ressursar og individualiserte tenester til rådvelde skal UBA bidra til gode vilkår for forsking og til eit kreativt og utviklande læringsmiljø for studentar.
Brukarane skal ha tilgang til relevante og nyttige tenester og til fysiske bibliotek som blir opplevde som attraktive læringsarenaer.
For å oppnå dette vil UBA

• styrke kontakten mellom biblioteket sine fagansvarlege og fagmiljøa
• møte brukaren der brukaren er, bl.a. ved å ta i bruk nye kommunikasjonskanalar
• styrke forskingsstønad til vitskapleg personale
• gjere systematiske målingar av brukarmønster og brukartilfredsheit
• utvikle innhald og tenester på grunnlag brukarundersøkingar og brukardialog
• bruke evalueringsmetodar for å betre undervisningstilbod og læringsressursar frå universitetsbiblioteket
• synleggjere innhaldet i biblioteket og tenester gjennom styrkt marknadsføring og profilering
• vidareutvikle ein serviceretta og endringsdyktig organisasjonskultur

Det bør etablerast eit råd for Universitetsbiblioteket, som får som hovudoppgåve å sjå til at UBA blir utvikla i tråd med føresetnader og mål. Rektoratet bør vere representert i Rådet for UBA.

Tilgang til informasjonsressursar

Universitetsbiblioteket skal raskt og kostnadseffektivt gi tilgang til digitale og papirbaserte informasjonsressursar gjennom oppbygging og tilrettelegging av eigne samlingar, via biblioteknettverket eller frå andre leverandørar. Universitetsbiblioteket har eit særleg ansvar for å vareta samlingar som har spesiell verdi for landsdelen.
Universitetsbiblioteket skal bidra til å synleggjere forsking og formidling ved universitetet gjennom elektronisk publisering, forskingsdokumentasjon og fysiske utstillingar.
For å oppnå dette vil UBA

• skaffe bøker og periodika i digital framfor papirbasert form der dette er fagleg forsvarleg
• bidra til at det nasjonale forskingsdokumentasjonssystemet blir brukarvennleg registreringskanal og til at den einskilde forskaren kjenner systemet
• bidra til vidareutviklinga av universitetet sitt arkiv for forskingspublisering (AURA) og stimulere til og gi stønad i bruken av arkivet
• etablere eit parallellarkiv til AURA for læringsobjekt og anna formidlingsstoff
• bidra til utvikling av gode søkjesystem og brukargrenseflater
Det inneber også at UBA må
• redusere omfanget av lite brukt materiale og overføre dette til Nasjonalbiblioteket
• redusere omfanget av trykte tidsskriftrekkjer der tilgang til forsvarleg lagra digital versjon finst

Kvalitet i læringsmiljøet (Læringsarenaen)

UBA skal bidra til eit kreativt og utviklande læringsmiljø og ein god læringsarena ved å stille gode fysiske fasilitetar, informasjonsressursar og eit kompetent personale til rådvelde. Gjennom undervisning i informasjonskompetanse skal UBA bidra til effektiv læring ved å gi studentane eit reflektert forhold til bruk av informasjonsressursar, som kunnskapar om søkjestrategiar, kjeldekritikk, bruk av referansesystem og etiske aspektar ved bruk av andre sine forskingsresultat og publisering.
For å oppnå dette vil UBA

• gi flest mogeleg studentar rettleiing og undervisning i bruk av kjelder og etiske aspektar ved bruk av andre sine åndsverk
• arbeid for at informasjonskompetanse blir uttrykt som læringsmål i UiAs studieprogram
• vidareutvikle dei fysiske biblioteka til tilgjengelege og gode læringsarenaer med varierte arbeidsplassar og riktig utstyr
• leggje opp til brukarvennlege opningstider
• samarbeid med andre miljø for læringsstønad om utvikling av tenester
• tilby bibliotektenester for desentralisert undervisning, for etter- og vidareutdanning og for utanlandske studentar

Kritiske suksessfaktorar

Om UBA skal lukkast i forhold til målsetjingane sine, avheng av om biblioteket blir i stand til å tiltrekkje seg tilstrekkeleg og riktig kompetanse, og om organisasjonen blir utvikla slik at det fremjar samarbeid med fagmiljø og andre einingar som yter læringsstønad. Men det krev også at universitetet har vilje til å utvikle biblioteket som læringsarena, ved å sikre tilstrekkeleg areal, riktig tekniske utstyr, osv. UBA er også avhengig av IT-stønad frå universitetet, og av effektive og tenlege nasjonale system.

Del/Tips: