UiA og Høgskolen i Telemark underteikner samarbeidsavtale

Ved underteikninga la dei to rektorane Torunn Lauvdal og Dag K. Bjerketvedt vekt på verdien dette nære samarbeidet vil ha for Agderfylka og Telemarksregionen.

Samarbeidsavtalen gjer også at tenestene kan formidlast meir kostnadseffektivt.

UiA og HiT tek sikte på å utvide samarbeidet etter kvart, men alt frå starten omfattar avtalen fagområda

• teknologiske fag inkludert IKT
• helse- og sosialfag
• lærarutdanning
• natur-, helse- og miljøvernfag, inkludert bioteknologi
• idretts- og friluftslivsfag
• kunstfag og estetiske fag

Felles forsking

I praksis vil samarbeidet omfatte utvikling av studieløp på tvers av institusjonane, overgangsalternativ mellom studium, utvikling av felles forskingsprosjekt, etablering og vidareutvikling av forskingssentre, utvikling av fellesgradar, og gjensidig bruk av utstyr og utveksling av personale.

Samarbeidet vil særleg konsentrere seg om forsking, forskarutdanning og mastergradsutdanning. Avtalen omfattar også samarbeid om administrative støttetenester som bibliotektenester, webpublisering, administrasjon av EU-prosjekt, IT-driftstenester, studie- og forskingsadministrasjon og økonomi- og personalforvaltning.

Samla har dei to store utdannings- og forskingsinstitusjonane rundt 13 000 studentar og 1 400 tilsette.

UIA og HIT samarbeider allereie på fleire område. No blir dette samarbeidet vesentleg styrkt og utvida.

- Vi skal likevel vere to sjølvstendige institusjonar, understrekar dei to rektorane.

Samarbeidet skal også styrkje og vidareutvikle UIA som universitet og underbyggje og fremje HiTs universitetsambisjonar. Høgskulen i Telemark arbeider planmessig for å oppnå universitetsstatus - anten aleine eller saman med andre - innan 2013.

Samarbeidsavtalen gjeld førebels for fem år.

Kommentarer